أضف سؤال أو موضوع جديد          

نصيحه وإذا جيت تروح الورش وش تسوي

up 22 down 8
أنيق 17573
قبل 8 سنه و 2 شهر



مساكم الله بالخير ياشبااب 
موضوعنا طويل اليوم شوي المعذره 


أعرفوا إذا نزلت موضوع اخر الليل توقعوا أن فيه فضفضه لالالازم ههههه
والله ياشباب جالس اتقلب مااش النوم عيا يجي 
والله السياره مهممممه فالحيااه 
والله لو كل واحد يذوق البهذله لمدة أسبوع بالتكاسي والمشي 
ياشباب أي شخص عنده موتر لو قرنبع ومعدوم بس يمشي 
اقسم بالله في نظري أنه اغنى واحد بالعالم حتى لو سيارته بدون مكيف 
ولايتذلل للتكاسي وكلن يتحكم فيه مره ٢٠ مره ١٥ 
غير وقفت الشمس تطلع ريحتك وانت مارحت مشوارك باقي 

وتعال نشوف النوع الثاني من الذل 
بعض الاحيان ماتكفي فلوسك وتروح تترجى زملائك وتشحذهم تكفى يافلان وصلني معك الله يخليك
أنا من النوع الي عزيز نفس اكره اطلب المساعده من احد صدق أعوذ بالله من الذل وقهر الرجال 
مايعيب الرجال إلا جيبه 
صدق كرهت الجامعه بهذا السبب 
لكن الله يعيين ونخلص قسم بالله كنها جبل على صدري 
والي عنده سياره يحمد ربه ويحافظ عالنعمه ويستخدمها أستخدام صحيح 
أنا بهذا الوضع لو شفت ورع راكب موتر وجالس يهايط فيه ويفحط قسم بالله ادعي عليه دعووه الله يحرمه من هالنعمه 
ولو ذاق المر لحافظ عليها 

اما رجال ربي منعم عليه ويستخدم السياره بالطريقه الصحيحه اقول الله يبارك له ويحفظه من كل شر 

واتوقع ربي لو رزقني موتر اكيد ماراح احركه هههه اخليه واقف وما اتعدى سرعة ١٠ هههههه خلاص تعذبت بدونها يشيخ حتى تشوفني متبطح عنده واتحدى أي قطو يمشي عليه خخخخ

فالله يرزقني وياكم من واسع فضله 
الله يرزقني السياره الي أتمناها عاجلا غير اجل 


باقي ماخلصنا ويين اجلسوا أجلسوا هههههه 
طبعا يوم كنت بماركيزي أيام العز قبل مايخبط 
كنت مسنتر بالورش كل يوم يخرب حاجه 
فكنت على نياتي اروح وانا لابس شماغي وثوبي شكل عادي بس كأني سعودي عندي راتب ٢٠٠٠٠ ألف من زود الهيبه خخخخ
فكانوا يصلخوني بالسعر مادروا أني مطفر صعلوك منتف بس دب هههههه 
المهم بحكي لكم قصه حصلت لي وصار مشكله بماركيزي فقلت اروح الصناعيه يشوف لها حل 
المهم وتذكرت أنهم يشوفونك سعودي يصلخونك بالسعر عندك فلوس 
فقلت مالي إلا اروح بقميص النوم الوسخ باقي ماحد غسله ههههه وريحته اخيس شيء 
وخذيت شبشب الحمام أبو اصبع الخضراء ومامشطت شعري خليته معكرش ههههه  وشوف أنيق كيف ههههه التواضع ماشاء الله الزهد طالع من عيوني 
ورحت الصناعيه 
أنارحت لورشه جيت افك الثلاجه لأن مسمارها انكسر داخل من الصدى فلازم يفكها ويجي الخراط ( المخرطه قصدي) ويطلع المسمار الي انكسر نصفه داخل 
المهم ورحت الورشه وقلت له القصه قال طيب ٣٠٠ ريال قلت خلاص  
المهم ودق جوالي وانا بالورشه والعامل بدأ بالشغل
واناظر طلع المنبه للفجر أمس نسيت وبدل ما أحطه صباحي حطيته مسائي هههه وهاتك مكالمه 
ألو كيف حالك ياعمنا أزييك ياأشطه عامل إيييه ياقدع ههههه
بتأوول إييه انته !؟ ويعنني جالس اسمع كلام الي دق علي خخخخ
سعادة حزرتك أقمتي أسم رحت القوازات وقددتها أزاي بأه نأل كفلتي للراقل التاني 
مش معؤوله كده يعني كدا خلاص ترحيل نهائي !؟ 
ههههه والعامل ينااظر فيني عيشته الجو 
خلاص مافيش مشكله أنا اقيلك ونتفاهم على الكلام دوت 
بس أؤلك 
رفعت راح للكفيل وألو مافيش مشكله نعطهملك ٢٠٠٠ بالشهر وأنا آخز البائي 

خلاص ألف سلامه ياباشا 
ههههههه
خلصت المكالمه 
جاك العامل صديق انتا مافي سعودي ؟ 
لالا أنا مصري 
مأليش صديق أنا فكر انت سعودي 
هههه لا 
أنا اصلن مصري بس ماما ولاده أنا هنا هههههه 
اووه الله كريم ياصديق 
قلت صادق 

بعد ماخلص الشغل 
قلت كم ؟ 
قال ٣٠٠ ريال 
قلت افف انا نفر اجنبي مافي فلوس زياده انا ميسكيييين صديق هههه
قال مافي مشكله جيب ٢٠٠ ريال 
١٠٠ ريال خلي انتا مساعده في فايده عشان اعطي كفيل 

المهم واشغل ماركيزي واشغل المسجل على حامد الضبعان ههههههاي ألبوم المقناص 
ههههه العامل يناظر *_* 
وادعس بماركيز العز 

وخلصت القصه 

الخلاصه 
١- إحمد الله على نعمة السياره لأنك لو تجلس اسبوع من دونها راح تتبهذل وتنذل 
٢- اذا جيت بتروح الورشه تصلح سيارتك لاتروح مكشخ روحك ، روح بقميص نوم ولا بدله ولا بنجابي هههه عشان يحن عليك ويخصم لك 



وآسف على الاطاله لكن منها فايده ومنها فضفضه 


ودمتم سالمين هههه

محبكم الرشيق 
& أنيق &









إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اهلا يا انيق 
والله يحفظك 
باقول لك قريت موضوعك 
اعجبتي فكرة انك تطلع بلبس عادي ووصخ 
يعني ابي افهم شي 
هالاجاناب او العمال اللي في الورش ما يفزعون بالتخفيض الا لبني جلدتهم او اجنبي 
او هم فاكرين السعودي يبيض ذهب 


الله اغننا بحلالك عن حرامك


up 3 down 1
صالح الصالح المصلح ا -39
قبل 8 سنه و 2 شهر



موضوع حليوة زي راعيه
عشان كدة احبابي من باب شكر النعم وسبب دوامها نقول الحمد لله والشكر لله على مارزقنا
وصدقت يا اخويا انيق السيارة نعمة من الله على الانسان
ونصيحة للشباب بالزات اللي عندهم سيارات جديدة ماشاء الله اقلهم احمدو الله عز وجل على هادي النعمة
غيركم ماعنده سيارة مرررررة
او سيارته قديمة كل يوم في ورشة وفي الصيانة

وحتى اللي عنده سيارة قديمة اقله احمد الله غيرك مقضيها تكاسي ومشي على رجوله

لا ينظر احدكم الى من هو اعلى منه لئلا تزدرو نعمة الله عليكم او كما قال عليه الصلاة والسلام

طبعا النظر المقصود في امور الدنيا
لكن في امور الدين يفترض بنا النظر لمن هو احسن وافضل منا

ويارب لك الحمد والشكر على مارزقتنا
وبلغ كل واحد ماعنده سيارة بسيارة تسر خاطره وتريح قلبه

وصبااااحكم عسل


up 2 down 1
العمدة 1434 1189
قبل 8 سنه و 2 شهر



في وطنك كن اجنبي لكي تعيش ..........اه من الأجانب


up 6 down 7
محمدالمقاطي 114
قبل 8 سنه و 2 شهر



 هذا 2014 الظاهر 

متى على الله املكة  او حتى اركبه ههههههههههه


up 1 down 1
راااضي 2520
قبل 8 سنه و 2 شهر



اهلا 


اليوم بس اكلم ولد اختي الرجال متخرج جديد 

وبيدرس كليه و مستحي من سيارته شروكي 2000

قلت اليه احمد ربك ان عندك سيارة في غيرك بتاكسي


انا ما صارت عندي سيارة اﻻ باخر سمستر من الكلية !

وكنت اروح بسيارة البيت سوبر 88 مكينة فيها شنبر 

اعبيها 10 ريال بنزين و 10 ريال زيت يوميا لمشوار واحد فقط

حتى اليمني صار يحجز ليي زيت فضيل التعبئة يجمعه وانا اشترية


up 2 down 0
عمر الزمان 672
قبل 8 سنه و 2 شهر



والله كلامك صدق  انا الحين اذا رحت ابي سيدي خرايط جق سيارة اودي
زود علي السعر يحسبني كاااش وهي ماتكلف 300ريال


up 1 down 0
دبلومااااسي 71
قبل 8 سنه و 2 شهر



الله يرزقك يا انيق بجيب لكزس 2014  وكالة والله انك رجال تستاهل وكفو


up 1 down 1
امجد 10 163
قبل 8 سنه و 2 شهر



الله يرزقنا ويرزقك بما نـتمناهـ

لاكن وانا اخوك مهو لازم تشتري جيب لكزس 2014

دورلك على أي سيارة نظيفه رخيصة وأشترها

عندك كابرس 90 والله انه موتر كفو ورخيص

والله يوفقنا وياك


up 1 down 1
ls caprice 2078
قبل 8 سنه و 2 شهر



احلى لايك لك اخي انيق

بصراحة انا من عشاق مواضيعك

مفيدة وأسلوب رائع في الكتابة
واصل يا بطل


up 0 down 0
mat2rain 246
قبل 8 سنه و 2 شهر



موضوع جميل ومفيد يا أنيق متشكر قدا ツ


up 0 down 0
نوار الوذيناني 510
قبل 8 سنه و 2 شهر



المشكله لو معك لكزس
والله لو تتنكر بكيس زباله بيصلخونك بيصلخونك


up 1 down 1
ملك الخطوط 235
قبل 8 سنه و 2 شهر



فعلا مو اي سياره تقدر تسوقها وتموه عليهم

مكشوف انك سعودي

ما معك الا تسوي نفسك سواق اذا تمشي معاك


up 0 down 0
ابو-لانا 185
قبل 8 سنه و 2 شهر



هلا انيق اش اخبارك 

آلُـُلٍْـُھٌہّ يرزقك الموتر اللي 
 ‏​​فِـٌٍـٌٍےْ بالك 

ولو تجي تشوف العيال 

 ‏​​فِـٌٍـٌٍےْ الثانوي عندي 

و آُْلُْـُْلّْہْ سيارات ماشاء آلُـُلٍْـُھٌہّ تلقى الفخم وتلقى المعدوم بس الاكثر 

سيارات فخمه 

وانا مسكين مقضيها كعابي 

سحب الوالد عليه ‏​​فِـٌٍـٌٍےْ السياره اللي كان 

وده يشتريها بس آلُـُلٍْـُھٌہّ الرازق 

اللي رزقهم ما يقدر يرزقني 

وانا معاك ‏​​فِـٌٍـٌٍےْ الهرجه انك تروح الورشه بملابس معدومه افضل شيء و آُْلُْـُْلّْہْ 

ومعليش طولت 


up 1 down 2
فيليكس 204
قبل 8 سنه و 2 شهر



مشكور يانيق 

دايم مواضيعك فففففلللللللة

الله يرزقك يا انيق بجيب لكزززززس 2014  فل الفل بريمي 


up 1 down 0
شبح 600 sel 6081
قبل 8 سنه و 2 شهر



اكثر من الاستغفار
استغفر الله .... استغفر الله ..... استغفر الله ........


up 1 down 0
أبــوســالــم 775
قبل 8 سنه و 2 شهر



ههههههههههه لبى قلبك يآ آنيق

وترا جيت آعطيك لآيك وما رضى , وجيت عطيتك دس لايك عشان آعدلهآ ومآ رضى :(

لكن ما عليك أبعدلها

وإن شاء الله تشتري موتر , بس ما قلت لي الماركيز بعته ولا باقي ؟ياليت تجاوبني


up 2 down 0
ابو يزيد 000 8712
قبل 8 سنه و 2 شهر



اخذه عمي 
ووقفه عند بيته 




up 1 down 0
أنيق 17573
قبل 8 سنه و 2 شهر



طيب ليه ما تبيعه ؟ 

بيعه تشليح , ترا ما يطلبون منك شيء , يعني لا تحسب انك إذا جيت تبيعه لازم تسدد المخالفات

لا 

بيعه تشليح ب 4000 الاف الى 5 الاف

وأستأجر سياره فوق 3 شهور وريح نفسك !!

تستاجر سياره لمده شهر بحدود 1200 الى 1500 ريال

وكد على السياره يوميا وطلع 30 ريال باليوم

30 ريال في 30 يوم تطلع لك 900 ريال

يعني في خلال شهر بتطلع 900 و رح جدد الايجار لمده معينه وكد على السياره من جديد , الى ان ربك يفرجها


up 1 down 2
ابو يزيد 000 8712
قبل 8 سنه و 2 شهر



والله احلى موضوع قراته فى هذا المنتدى الجميل وخاصة عندما يقلد المصريين فى لهجتنا 

الشائعه  والمميزة ،،،،اضحكتنى يا انيق وفقك الله وادام الله عليك نعمة السرور والفكاهه نحن
احنا المصريين نعشق الفكاهه وخفة الدم مثلك
لك تحياتى


up 1 down 0
d. fathy 3
قبل 8 سنه و 2 شهر



انيق مبدع دائما مواضيعة جميلة 




up 1 down 1
باسل الروقي -40
قبل 8 سنه و 2 شهر